Mit lääre Händ u Regal, derfür miteme volle Härz undeme bunte Bluemestruss a Erfahrige richer, geit z Pop up "Feines für dich" früehzitig z End.
I bi überwältiget u dankbar für aues wo mir hei dörfe im Monat Dezember erläbe, begägne u kennelerne.
Unzählige Nachtschichte heimer igleit, hei etikettiert bismer fasch nüm obe u unge vom Glas hei chönne unterscheide, hei grossartigi Unterstützig vo Fründe u Familie erfahre, si definitiv ou a persönlechi Gränze gstosse u hei immer wieder nöis dörfe derzue lerne.
Danke öich aune wo sit verbi cho - dir heits müglech gmacht, dass i mi Troum, mini Liedeschaft, woni sit dr Chindheit hege, ha dörfe läbe. Die Erfahrig bedütet mir ungloublech viel!
U übrigens "Feines für dich" geit witer, mir mälde üs im nöie Jahr u gönne üs zersch ou e Winterrueh.
Bis dahin gniesset d Festtag u häbet öich sorg!
P.S. Einigi hei ide letzte Täg im Lade no gfragt, werum mir nid tüe nacheproduziere?
D Natur isch zur Zyt ir Winterrueh u üs isches wichtig immer lokal, saisonal u mit sälber gsammlete Sache z schaffe, drum möchte mir nid mit zuegchoufte Sache nacheproduziere.